वीज पडून आशिष थोडक्यात बचावला!

गोंदिया :- भर पावसाळ्याच्या दिवसात वीज पडून जीवित हानी होण्याच्या अनेक घटना घडताना दिसतात. अशीच घटना (दि.6) रोजी जिल्ह्यातील रजेगाव येथे घडली असून सायंकाळी साडेपाच वाजे च्या सुमारास जोरदार पावसाला सुरुवात झाली या दरम्यान पीडित आशिष राजू पाटील (14)रा. रजेगाव हा नवीन गृह बांधकामातील स्लॅबवरील पाणी बाहेर काढत असताना अचानक वीज कोसळली व तो स्लॅब वरून खाली पडला. विजेची तीव्रता इतकी भयानक होती की त्यात पीडिताचे पोट व पायावरील भाग गंभीर रित्या क्षतिग्रस्त झाले. ही बाब लक्षात येताच त्याच्या पालकांनी शेजाऱ्यांच्या मदतीने तातडीने सहयोग हॉस्पिटल गोंदिया येथे भरती केले असून तेथील अतिदक्षता विभागात उपचार घेत असल्याची माहिती मिळाली. यावेळी आशिष ची तब्येत चिंताजनक असून त्याच्या वैद्यकीय उपचारासाठी शासनातर्फे तातडीने मदत मिळावी अशी मागणी पिडिताचे पालकांनी केली आहे.