डॉ. भीमराव आंबेडकरांचे आगमन गोंदियात

गोंदिया :- अशोका विजयादशमी निमित्त धम्मचक्र प्रवर्तन दिन व वर्सावास समापन महोत्सवाच्या निमित्ताने गोंदिया येथील बुद्धिस्ट समाज संघ संथागारच्या नवनिर्मित पहिल्या माळ्याचे उद्घाटन प्रसंगी उद्घाटक म्हणून भारतीय बौद्ध महासभेचे राष्ट्रीय कार्याध्यक्ष तथा समता सैनिक दलाचे राष्ट्रीय अध्यक्ष आदरणीय डॉ. भीमराव यशवंतराव आंबेडकर साहेबांचे (दि.29)रोजी संथागार गोंदिया येथे आगमन होत आहे. यादरम्यान साहेबांचे जाहीर नागरी सत्कार होणार आहे. त्यासोबत आंबेडकरवादी मिशनचे संस्थापक माननीय दीपक कदम सुद्धा उपस्थित राहणार आहेत. यानिमित्त तेथे उपस्थित विद्यार्थ्यांना स्पर्धा परीक्षा विषयी मार्गदर्शन करणार आहेत.मागील अनेक वर्षापासून संथागार इथे प्रबोधन, शैक्षणिक जनजागृती, वैवाहिक कार्यक्रम असे अनेक उपक्रम राबवले जातात. तेव्हा उद्घाटन समारंभाला आदरणीय डॉक्टर भीमराव यशवंतराव आंबेडकर साहेबांचे आगमन होत असल्याने संपूर्ण जिल्हा वाशियांच्या मनात उत्सुकतेचे वातावरण आहे. तेव्हा या कार्यक्रमाला संपूर्ण जिल्ह्यातील व लगतच्या मध्य प्रदेशातील हजारो कार्यकर्त्यांनी आपली उपस्थिती दर्शवावी असे आवाहन बुद्धिस्ट समाज संघ संथागार परिवारच्या वतीने करण्यात आले आहे.