अति दुर्गम व नक्षलग्रस्त सालेकसाला नवे पोलीस निरीक्षक; नागरिकांच्या अपेक्षा उंचावल्या
राजू फुंडे :प्रतिनिधी, सालेकसा
सालेकसा, दि. १ जुलै : गोंदिया जिल्ह्यातील अति दुर्गम व नक्षलग्रस्त म्हणून ओळख असलेल्या सालेकसा पोलीस ठाण्यात आज रवि नागोसे यांनी नव्या पोलीस निरीक्षक म्हणून पदभार स्वीकारला. त्यांच्या नियुक्तीमुळे तालुक्यातील नागरिक, व्यापारी, शेतकरी, विद्यार्थी तसेच दुर्गम भागातील ग्रामस्थांमध्ये कायदा व सुव्यवस्थेबाबत नव्या अपेक्षा निर्माण झाल्या आहेत.
सालेकसा तालुका हा जंगलव्याप्त, आदिवासीबहुल आणि नक्षलप्रभावित क्षेत्र असल्याने येथे पोलीस प्रशासनाची भूमिका अत्यंत महत्त्वाची मानली जाते. अशा परिस्थितीत नागरिकांना सुरक्षित वातावरण, गुन्हेगारीवर प्रभावी नियंत्रण, अवैध धंद्यांवर कठोर कारवाई, वाहतूक शिस्त, महिलांच्या सुरक्षिततेसाठी विशेष उपाययोजना आणि दुर्गम गावांमध्ये नियमित पोलीस जनसंवादाची अपेक्षा आहे.
याशिवाय युवकांना कायद्याबाबत जनजागृती, सायबर गुन्ह्यांविषयी मार्गदर्शन, ग्रामसुरक्षा समित्यांना बळकटी, शाळा-महाविद्यालयांमध्ये जनजागृती कार्यक्रम तसेच नागरिक आणि पोलीस यांच्यात विश्वासाचे नाते अधिक दृढ करण्यासाठी प्रयत्न होतील, अशी आशा व्यक्त केली जात आहे.
नव्या पोलीस निरीक्षकांच्या नेतृत्वाखाली सालेकसा तालुक्यात शांतता, सुरक्षितता आणि लोकाभिमुख पोलीस प्रशासनाला अधिक चालना मिळेल, असा विश्वास नागरिक व्यक्त करीत आहेत. कायदा व सुव्यवस्था अधिक मजबूत करून सर्वसामान्यांना न्याय मिळवून देण्याच्या दिशेने त्यांचे कार्य प्रभावी ठरेल, अशी अपेक्षाही व्यक्त होत आहे.
