संत कबीर कैवल्य आश्रमातील विद्यार्थी विकास शिबिराला उत्स्फूर्त प्रतिसाद

गोंदिया, दि. ९ जून – संत कबीर कैवल्य आश्रम, किंडगीपार येथे विद्यार्थ्यांच्या सर्वांगीण विकासासाठी दिनांक १ जून ते १० जून दरम्यान विशेष शिबिराचे आयोजन करण्यात आले आहे. शारीरिक, शैक्षणिक आणि अध्यात्मिक अशा त्रिसूत्रीवर आधारित या शिबिरात ७ ते २५ वर्षे वयोगटातील सुमारे ३५ ते ४० विद्यार्थ्यांनी उत्स्फूर्त सहभाग नोंदविला आहे.

शिबिरामध्ये विद्यार्थ्यांच्या शारीरिक तंदुरुस्तीला प्राधान्य देत दररोज सकाळी विविध प्रकारच्या कवायती, व्यायाम तसेच स्वसंरक्षणाचे धडे दिले जात आहेत. स्वसंरक्षणाशी संबंधित विविध प्रात्यक्षिके दाखवून विद्यार्थ्यांना प्रत्यक्ष सराव करण्यास प्रोत्साहित करण्यात येत आहे. त्यामुळे विद्यार्थ्यांमध्ये आत्मविश्वास, शिस्त आणि शारीरिक सक्षमतेची जाणीव निर्माण होत आहे.

यासोबतच शैक्षणिक क्षेत्रातील विविध विषयांवर तज्ज्ञ मार्गदर्शकांकडून विद्यार्थ्यांना मार्गदर्शन केले जात आहे. राष्ट्रीय आणि आंतरराष्ट्रीय स्तरावरील घडामोडी, बदलते शैक्षणिक प्रवाह, करिअरच्या संधी तसेच भविष्यातील आव्हानांना सामोरे जाण्यासाठी आवश्यक कौशल्ये याबाबत विद्यार्थ्यांना सविस्तर माहिती देण्यात येत आहे. त्यामुळे विद्यार्थ्यांचा बौद्धिक विकास होण्यास मदत होत असून त्यांच्यामध्ये सकारात्मक विचारसरणी निर्माण होत आहे.

अध्यात्मिक सत्रांमधून विद्यार्थ्यांना संस्कार, नैतिक मूल्ये, आत्मपरीक्षण आणि जीवनातील सकारात्मक दृष्टिकोन यांचे महत्त्व पटवून दिले जात आहे. आश्रमातील अध्यात्मिक वातावरणाचा लाभ विद्यार्थ्यांना मिळत असल्याने त्यांच्या व्यक्तिमत्त्व विकासाला नवी दिशा मिळत आहे.

हे शिबिर विद्यार्थ्यांमध्ये नवचेतना निर्माण करणारे आणि स्पर्धात्मक युगात सक्षम नागरिक घडविणारे ठरत असल्याची भावना पालक आणि मार्गदर्शकांनी व्यक्त केली आहे. शिबिराच्या यशस्वी नियोजनासाठी सिहान ईश्वर वरखडे तसेच सीहान जनार्दन कुसराम, सेनसाई उपासराव सोनवणे यांनी विशेष परिश्रम घेतले असून विद्यार्थ्यांच्या शारीरिक सक्षमतेची जपणूक आणि व्यक्तिमत्त्व विकासासाठी त्यांनी मोलाचे मार्गदर्शन केले आहे.

सर्वांगीण विकासाचा ध्यास घेत आयोजित करण्यात आलेले हे शिबिर विद्यार्थ्यांच्या उज्ज्वल भवितव्यासाठी प्रेरणादायी ठरत असून परिसरात त्याचे सर्वत्र कौतुक होत आहे.