गंगाझरी रेल्वे स्थानकाजवळ रेल्वेच्या धडकेत अस्वलाचा मृत्यू; वन्यजीव सुरक्षेवर पुन्हा प्रश्नचिन्ह

गोंदिया, दि. ५ जुलै : – गंगाझरी रेल्वे स्थानकाजवळ शनिवारी (दि. ५) सकाळी सुमारे ७ वाजताच्या सुमारास रेल्वे रुळ ओलांडत असताना भरधाव रेल्वेची धडक बसून एका रानअस्वलाचा जागीच मृत्यू झाला. या घटनेमुळे परिसरातील वन्यजीवांच्या सुरक्षिततेचा प्रश्न पुन्हा एकदा ऐरणीवर आला असून वन्यजीवप्रेमींनी तीव्र चिंता व्यक्त केली आहे.

गंगाझरी परिसर हा दाट जंगलांनी वेढलेला असून येथे अस्वल, बिबट, हरिण, रानडुक्कर तसेच इतर वन्यप्राण्यांचा मोठ्या प्रमाणावर वावर असतो. अन्न, पाणी किंवा अधिवासाच्या शोधात हे प्राणी अनेकदा रेल्वे रुळ ओलांडतात. त्यामुळे रेल्वेच्या धडकेत वन्यप्राण्यांच्या मृत्यूच्या घटना अधूनमधून घडत असून, यावर प्रभावी उपाययोजना करण्याची मागणी वारंवार होत आहे.

शनिवारी घडलेल्या घटनेत रेल्वे रुळ पार करताना अस्वलाला भरधाव रेल्वेची धडक बसली. धडक इतकी भीषण होती की अस्वलाचा जागीच मृत्यू झाला. घटनेची माहिती मिळताच वन विभागाचे कर्मचारी घटनास्थळी पोहोचले. आवश्यक पंचनामा करून पुढील कार्यवाही करण्यात आली.

वन्यजीवप्रेमींच्या मते, या भागात वन्यप्राण्यांची नियमित हालचाल होत असतानाही त्यांचे संरक्षण करण्यासाठी आवश्यक ती खबरदारी घेतली जात नसल्याचे दिसून येते. रेल्वे मार्गालगत संवेदनशील ठिकाणी वन्यप्राण्यांच्या हालचालींचे निरीक्षण, सतर्कता यंत्रणा, कुंपण, तसेच रेल्वे प्रशासन व वन विभाग यांच्यात अधिक समन्वयाची गरज असल्याचे त्यांनी सांगितले.

याशिवाय, परिसरात वन विभागाच्या देखरेखीअभावी अवैध वृक्षतोड, शिकारीचे प्रयत्न आणि जंगलातील इतर अनधिकृत हालचाली वाढत असल्याचीही चर्चा स्थानिकांमध्ये आहे. अशा प्रकारांवर वेळीच नियंत्रण न ठेवल्यास वनसंपदा आणि जैवविविधतेला मोठा धोका निर्माण होऊ शकतो, अशी भीती व्यक्त केली जात आहे.

गंगाझरी परिसर हा वन्यजीवांसाठी महत्त्वाचा अधिवास मानला जातो. त्यामुळे या क्षेत्रात वन्यजीव संरक्षणासाठी अधिक सक्षम यंत्रणा उभारणे, नियमित गस्त वाढविणे, रेल्वे मार्गावरील धोकादायक ठिकाणांची ओळख करून विशेष उपाययोजना करणे आणि वन्यजीवांच्या सुरक्षित मार्गांची निर्मिती करणे आवश्यक असल्याचे पर्यावरणप्रेमींचे मत आहे.

दरम्यान, अस्वलाच्या मृत्यूच्या घटनेमुळे वन्यजीव संरक्षणाच्या उपाययोजनांची प्रभावी अंमलबजावणी करण्याची मागणी पुन्हा एकदा जोर धरू लागली आहे. संबंधित विभागांनी या घटनेची गांभीर्याने दखल घेऊन भविष्यात अशा घटना टाळण्यासाठी ठोस पावले उचलावीत, अशी अपेक्षा नागरिक आणि वन्यजीवप्रेमी व्यक्त करत आहेत.