महामार्गावरील प्रवासी निवारा हटविल्याने अंभोरा येथील प्रवाशांचे हाल

महिला, ज्येष्ठ नागरिक व विद्यार्थ्यांना उन्हात-पावसात उभे राहण्याची वेळ

गोंदिया : प्रतिनिधी

गोंदिया–बालाघाट राष्ट्रीय महामार्गावरील अंभोरा गाव महामार्गापासून काही अंतरावर असल्याने येथील नागरिक शहराकडे जाण्यासाठी प्रथम महामार्गालगत येऊन वाहनांची प्रतीक्षा करतात. मात्र महामार्गाच्या नव्या बांधकामादरम्यान येथे असलेला प्रवासी निवारा हटविण्यात आल्याने प्रवाशांची मोठी गैरसोय होत आहे. उन्हाळ्याची कडक ऊन असो किंवा पावसाळ्यातील मुसळधार पाऊस, प्रवाशांना कोणत्याही संरक्षणाविना रस्त्याच्या कडेला उभे राहावे लागत असल्याचे चित्र सध्या दिसून येत आहे.

अंभोरा परिसरातील नागरिक, विद्यार्थी, शेतकरी, महिला तसेच ज्येष्ठ नागरिक दररोज विविध कामानिमित्त गोंदिया शहरात ये-जा करतात. महामार्गालगत उभे राहून वाहनांची वाट पाहताना पूर्वी प्रवासी निवाऱ्याचा मोठा आधार होता. मात्र महामार्गाच्या विस्तारीकरणाच्या कामामुळे हा निवारा पाडण्यात आला असून त्याऐवजी अद्याप नवीन निवाऱ्याची उभारणी करण्यात आलेली नाही.

यामुळे विशेषतः महिला व वृद्ध प्रवाशांना उन्हात व पावसात दीर्घकाळ थांबावे लागत असून अनेकदा लहान मुलांसह प्रवास करणाऱ्या महिलांनाही मोठा त्रास सहन करावा लागत आहे. पावसाळ्यात ओले होण्याबरोबरच रस्त्यालगत उभे राहिल्याने अपघाताचा धोकाही वाढत असल्याची चिंता नागरिकांनी व्यक्त केली आहे.

स्थानिकांच्या म्हणण्यानुसार, संबंधित प्रशासनाला या समस्येची पूर्ण कल्पना असूनही प्रवाशांच्या मूलभूत सुविधांकडे दुर्लक्ष केले जात आहे. महामार्गाचे काम पूर्ण होत असताना प्रवासी निवाऱ्याची पुनर्बांधणी करणे ही संबंधित यंत्रणेची जबाबदारी असतानाही त्याकडे गांभीर्याने पाहिले जात नसल्याचा आरोप नागरिकांनी केला आहे.

अंभोरा येथील नागरिकांनी संबंधित प्रशासनाने तातडीने दखल घेऊन महामार्गालगत सुरक्षित व सुसज्ज प्रवासी निवारा उभारावा, अशी मागणी केली आहे. अन्यथा प्रवाशांचा वाढता त्रास लक्षात घेऊन लोकशाही मार्गाने आंदोलन करण्याचा इशाराही काही नागरिकांनी दिला आहे.